ID: 11
 Data e postimit: 0000-00-00 00:00:00
Titulli: Tragjedi te ngurtesuara
Lloji: Poezi lirike
Tema: Tragjedi te ngurtesuara
Autori: Vasil Tabaku
Qyteti: Tirane
E-mail: vasiltabaku@yahoo.com
Teksti:
TRAGJEDI TË NGURTËSUARA

Shqipëri
dhimbje e dimërt
e shpirtit tim.
Dimërzuar dimërisht
hesht
në cep të shekullit të ri.
Nëpër zërin tim
rrokullisen gurë
si tragjedi të ngurtësuara
nën një qiell klithmash...

Sa larg
sa thellë
sa e dhimbshme
paska qenë LIRIA...
Fjalën
dhe frymën
dritën
dhe zërin
këngën
dhe ajrin
dashurinë
dhe shpresën
gjakun
dhe jetën
jetën

dhe përtej jetën
të gjitha
gjithçka
u bënë gurë dhe drurë
pemë dhe lum
u bënë male të ngrënë nga dhimbja...

Trupi ynë i brishtë
supzhveshur
lagur prej shirave
kafshuar ujqërisht
lëkundur mes jetës dhe vdekjes...
Shtati ynë
i ndarë përgjysmë
copëtuar
mbi rrënojat e kontinentit të vjetër
ashtu si sythat
në trungun e pemës
kërkon të rilind...
Mbi copëza tragjedish të ngurtësuara
mbi troje tradhtish rrëshqitëse
mbi buzëqeshe vrasëse
mbi fjalë të gjymtuara...

Mbi dhimbjen
mbi hirin e zjarreve të egër
mbi heshtjen vrasëse
do të ribëhet gjithçka
gjithçka do të rilind...