Data e postimit: 0000-00-00 00:00:00
Titulli: Shperberje
Lloji: Poezi lirike
Tema: Shperberje
Autori: Vasil Tabaku
Qyteti: Tirane
E-mail: Email eshte i fshehur!
Teksti:
SHPËRBËRJE

Dhimbja
vesh këpucët e heshtjes
mbi rrugën e kafshuar
nga hapat e varfërisë.
Supet e mi
janë frymëmarrja e detit
me hënën
mbi zambakët e bardhë.
Duart
kanë
humbur ndjesinë e prekjes.
Pëllumbat e gjinjve fërfëritës
qajnë
nga mungesa e dashurisë.
Po shpirti
shpirti
harbon fushave të trishtimit
si kalë frekëputur
me brinjët e hapura
fizarmonikë e vetmuar
me puthjen e platint
të hënës së çmendur
në duar.

Tani për tani
kam vetëm
mollën e kafshuar të Adamit
dhe zbrazëtinë e frikshme të heshtjes.
Është e vështirë
të ribëjë gjithçka nga e para...
Gjersa Eva
mësoj artin e puthjes
dhe formën e shkëlqyer
për ta tradhtuar.
Po dhimbjes
i rrinë të vogla këpucët e heshtjes...