Data e postimit: 0000-00-00 00:00:00
Titulli: Qelq i thyer
Lloji: Poezi meditative-filozofike
Tema: Qelq i thyer
Autori: Vasil Tabaku
Qyteti: Tirane
E-mail: Email eshte i fshehur!
Teksti:
QELQ I THYER

Nëse Bota është e qelqtë,
do të thotë se ne mund të vështrojmë
përmes barkut të saj të mbyllur...
Kujdes se thyhet,
thyhet fytyra e shkëlqyer e femrës,
poshtë mjekrës së parruar të shtegtarit,
thyhen sytë e qelqtë,
thyhen hapat tanë,
vallëzimi ynë
nëpër rrugët e ngrira...
Xhamat e qyteteve
vështrojnë nga qielli,
aty ka mbetur i ngurtësuar
zëri im
si shpend i balsamosur.
Kam kërkuar më tepër dritë
më shumë kaltërsi
por vetullat e qiejve
kanë qenë të ngrysura
si vetulla pleqsh të zymtë...
Një erë e qelqtë
trazon flokët e bukur të vajzave,
mbulon
përmendoret drithëruese të puthjeve.
Era e qelqtë,
trazon pluhurin e rrugëve,
trazon pemët nëpër udhëkryqe
dhe njerëzit që mendohen për rrugën
një pjesë e tyre
kanë aty një jetë njeriu që mendohen
kur të vendosin
udhëkryqi
do të jetë fshirë nga harta e Botës.

Janë thyer të gjithë xhamat e dritareve
qelqet
kanë mbushur oborrin.
Këmbëzbathur
endem nëpër oborr
mbi qelqet e thyera
si mbi petale lulesh transparente...
Sa keq
nuk ribëhen më lulet nga petalet e rëna

Sytë e mi
kanë rënë në tokë
qelqe të thyera,
copërat e të cilit
mundohem ti mbledh
një e nga një...

Kështu me sytë të thyer
ngatërroj gjithçka
fytyrën e së dashurës
e ngatërroj me një qiri të ndezur...
Duart dhe puthjet
digjen dalëngadalë ...
Zemra ime
shpohet nga qelqet e thyera,
gjithçka quhet thyerje...