Data e postimit: 2016-09-17 11:56:32
Titulli: Mbrojtja e ambientit.
Lloji: Ese argumentuese
Tema: Mbrojtja e ambientit.
Autori: dajana
Qyteti: lezhe
E-mail: Email eshte i fshehur!
Teksti:
Ambienti është ai në të cilin njeriu zhvillon veprimtarinë e tij jetësore dhe pa të, ai nuk do të mund të ekzistonte. Duke u fokusuar tek mënyra se si të fitojë më shumë para, njeriu po e anashkalon kujdesin ndaj ekuilibrave natyrorë. Me ndotjen e tokës, ujit dhe ajrit, dëmtohen e gradualisht shkatërrohen ekosistemet dhe habitatet natyrore të kafshëve dhe bimëve. Dëmtimi i florës dhe faunës, njëkohësisht sjell përkeqësimin e gjëndjes së mjedisit dhe cilësisë së jetës. Duke parë rëndësinë e mjedisit, lind nevoja e madhe për mbrojtjen e tij. Në Shqipëri rastet e ndotjes së mjedisit janë të pafundme.

Njeriu e shfrytëzon tokën në favor të interesave të tij, ku gjatë përdorimit ka dhe disa kosto mjedisore, të cilat duhen minimizuar në maksimum.
Ndotja e tokës paraqet ndotjen e sipërfaqes natyrore të Tokës nga aktivitetet industriale, komerciale, shtëpiake dhe bujqësore. Mënyra më e mirë për të parandaluar ndotjen e tokës është përmes menaxhimit të mbeturinave në mënyrë te organizuar, shfrytëzimit të tokës në mënyrë te organizuar dhe praktikave adekuate bujqësore¹.

Në vendin tonë rastet e ndotjes së tokës janë të shumta. Në zonën e Porto-Romanos, në qytetin e Durrësit çdo ditë digjen me qindra ton mbeturina, ku mbetjeve urbane i bashkohen dhe ato spitalore. I gjithë procesi bëhet mbi një sipërfaqe toke të sheshtë dhe ku ndotja shkon 7-8 herë mbi nivelin e lejuar. E gjithë kjo situatë sjell pasoja të rënda mjedisore dhe dëmton shëndetin e njerëzve².

Shumë procese në natyrë kryhen falë ekzistencës së ujit, të cilin njeriu po e ndot dita-ditës.
Burimet ujore , po preken si nga faktorët shoqërorë (derdhja në ujëra e kimikateve, naftës etj.) ashtu dhe nga faktorët natyrorë (përzierja e ujërave sipërfaqësorë me ujërat e ndotura nëntokësorë). Ndotja e ujit sjell pasoja të rënda për jetën, si: zhdukja e gjallesave të ndryshme të ujit, mosperdorimi për nevojat jetike i ujit, përhapjen e sëmundjeve infektive etj³.

Në Shqipëri ndotjen e ujit e gjejmë prezente në të gjitha format. Përdorimi pa kriter i burimeve naftëmbajtëse nga një kompani e huaj për nxjerrjen e naftës, shkaktoi shpërthimin e dy puseve në zonën e Patos-Marinzës. Kjo situatë solli ndotjen e ujit, ku Instituti i Shëndetit Publik konfirmoi praninë e lëndëve toksike në ujin e ujësjellësit dhe burimeve ujore nëntokësore të zonës⁴.

Ajri është një ndër elementët bazë të ekzistencës së gjallesave, ku dekadat e fundit, megjithë vendosjen e limiteve të ndotjes nga vendet më të zhvilluara, ai po ndotet vazhdimisht.
Zhvillimi i industrisë dhe përdorimi i makinave ka shkaktuar ndotjen e ajrit, sidomos në zonat e banuara. Pasojat e këtyre zhvillimeve kanë sjellë sëmundje të rënda tek njerëzit dhe dëmtimin e ekosistemeve natyrore⁵.

Në vendin tonë, vitin e kaluar gjatë matjeve të kryera nga Ministria e Mjedisit, u konstatua se në Tiranë niveli i ndotjes së ajrit ishte 20 % më shumë se norma e përcaktuar nga Bashkimi Evropian⁶.

Duke parë rëndësinë e mjedisit dhe atë ç’ka po ndodh me të këto dekadat e fundit, lind nevoja që çdo individ të ndërgjegjësohet dhe të punojmë për ruajtjen e mjedisit. Pasojat që sjell ndotja mjedisore dhe situata aktuale që paraqitet një vendin tonë, janë vërtet shqetësuese. Për një cilësi jete më të mirë, duhet kontribuar në ruajtjen e mjedisit.