Data e postimit: 0000-00-00 00:00:00
Titulli: ZËRA TË LARGËT
Lloji: Poezi lirike
Tema: ZËRA TË LARGËT
Autori: Vasil Tabaku
Qyteti: Tirane
E-mail: Email eshte i fshehur!
Teksti:
Hapa të lehtë
Me sandale gjethesh
Më ndjekin nga pas në fshehtësi
Ndaloj në skaj të dhimbjes sime
Bërrylat e lodhur
Mbështes mbi trung të pemës.
Nuk paskan qenë gjethet
Je ti fëmijëri
Brilanti im i vetëm i jetës...

Kam hedhur mbi shpinë
një lum trazavcaç
ca të qeshura të pafajshme
fëmijërinë time krejt lakuriq
ca pëllëmbë bythëve dhënë prej dallgëve.
Një puthje e dhënë hajdutërisht,
një lot i vogël si rruazë vajze
ca trille moshe
zabelit rendin çmendurisht...

Mbi trung të pemës
Mbështetur si një dru i prerë
Vështroj vetveten në thellësi
Sa shumë vite paskam udhëtuar pa u ndjerë
Për të të riparë edhe njëherë ty fëmijëri...

Ca gjethe pemësh
Më mbulojnë supet.
Mbi mua ca hapa të lehtë vrapojnë
Ndër duar
Më shkërmoqet si kokrra shege
E qeshura e largët, pa moshë dhe stinë.
Unë rend mbi prushin e ndezur të yjeve
Nxitoj
Të kap për dore fëmijërinë
Ndër duar
Më mbeten veç ca gjethe
Dhe copëra qielli
Qëndisur me buzëqeshje dhe zërin tim