Metamorfoza!
Në një ditë të bukur me diell dola shëtitje në zemër të metropolit tone.
Kishte shumë , shumë lëvizje , njerëz të ndryshëm qe ndiqnin rrugë të kundërta me njëri-tjetrin.Sec dëgjoje disa zhurma makinash , bori të pafundme , shitësit që të ofronin produktet e tyre , a thua të ishin më të mirat në botë ! Vallë c’ishin këto njerëz të vrenjtur me dosje nëpër duar , me makina të shtrenjta , që shikonin vazhdimisht orën duke nxituar për të kapur oraret e punës.
Më e bukura ishte se këta kalonin plot luks dhe elegancë sikur donin t’u bënin publicitet njerëzve te varfër , te ulur nëpër qoshet e rrugëve , me pjesë fizike te gjymtuara që shikonin nga këto njerëz te cekët sikur të ishin burimi i tyre i jetesës pavarësisht se këta të fundit nuk e vinin ujin në zjarr në këtë drejtim. Por ironia vazhdon edhe më tej kur shikoje nëna që kishin fëmijë nëpër duar duke u larë xhamat e makinave njerëzve të pushtetit , që edhe atë kosto të vogël pagese e jepnin me njëmijë llafe. Rrugëtimi im vazhdoi edhe me tej . Është një qytet i bukur , që çdo ditë e më shumë në të ngrihen minigradacela të reja ku duket sikur secila i shet mend tjetrës se kush është më e gjatë dhe kush më e bukur , apo se në cilën prej tyre bëheshin më shumë selfie.
Ah këto janë të rinjtë, të veshur bukur , me tablet dhe iphone nëpër duar, dhuratë nga babi , dhe me buzët me silikon dhuratë nga mami. Ata të binin shpesh herë dhe në shpinë pasi nuk e kishin fare mendjen se ku vinin këmbët dhe nuk nguronin as te thonin fjalën magjike të mësuar në kopësht tashmë të harruar , të ëmblën “Më fal”. Po , po ky është realiteti i sotëm ku secili sheh punën e tij , ku asnjëri s’do t’ia di për ty , ku morali dhe ndërgjegjia vlerësohen me notën 4 dhe teoria e marrjes së farës së kosit hua mbetet e pluhurosur në arkivat e komshinjëve të vjetër.Gjithsesi ndoshta u tregova pak kritike në shkrimin tim ,por megjithatë unë jam optimiste se Shqipëria jonë do të ecë përpara dhe do të ketë gjithmonë ditë të bukura me diell ose më saktë unë e dua me çdo kusht këtë ndryshim.
Ndalohet rreptesisht ri-botimi i paautorizuar i veprave te postuara ne kete
website neper website te tjera!
Perjashtim ben rasti kur shkruani emrin e vertete te autorit te vepres se
bashku me linkun zyrtar te vepres!
